شويكار... الفنانة الجميلة المفعمة بالانوثة والامل والي امتعتنا بفنها لسنين طويلة، وجسدت أدوار مختلفة ومتنوعة. اتولدت شويكار سنة 1938 وتوفت السنة الي فاتت بعد ما اتمت 81 سنة. والي متعرفوش ان شويكار مش مصرية دي أصولها تركية شركسية بس عاشت في مصر طول حياتها وماتت فيها برضو. ومن لما كانت طفلة وهي بتعشق الفن والفنانين وخاصة الفنانة ليلى مراد. 

التحقت بالمدارس الفرنسية في مصر، وبعد ما تمت 18 سنة تزوجت بالمهندس حسن نافع وانجبت منه طفلتها منة الله. بس للأسف أصيب بمرض خطير وتوفى بعد فترة قصيرة جدا من زواجها. الأيام دي كانت صعبة على شويكار اوي لأنها ربت بنتها واكملت دراستها في نفس الوقت. وده الي خلاها تاخد لقب الأم المثالية في نادي سبورتنج الي تصادفت فيه بعدد كبير من المخرجين والفنانين. والي كانوا سبب في تشجعها للالتحاق بالفرقة التمثيلية في النادي. 

واستمرت حياتها بالشكل ده لحد ما جت النقطة الفاصلة فيها وهي مشاركتها في أول فيلم ليها "حبي الوحيد" قدام عمر الشريف ونادية لطفي. وبعدها بدأت تشارك في عدد كبير من الأفلام المتنوعة لحد ما جت النقطة الفاصلة التانية في حياتها. وهي مشاركتها في مسرحية السكرتير الفني الي كان المفروض سيد بدير هو بطلها بس اعتذر في اخر لحظة وجه مكانه أستاذ فؤاد المهندس. 

وكانت المسرحية دي هي شرارة الحب بينهم والي بدأت علاقتهم كصداقة في البداية وبعد كدة اتحولت لحب. والمميز في علاقتهم إن الجمهور الكبير كان شاهد عليها، لأنهم اعلنوا حبهم لبعض في احد العروض المسرحية وتزوجوا كمان بعد عرض مسرحي قرر فيه فؤاد المهندس انه يفاجئ شويكار ويعرض عليها الزواج قدام الجمهور كله. 

وبالرغم من ان قصة حبهم كانت ناجحة جدا، وده خلاها تدوم لعشرين سنة، إلا ان للأسف مدامتش وكانت الغيرة سواء من الناحية العاطفية أو من النجاح في العمل هي سبب فشلها.  وخاصة إن شويكار في الوقت ده كانت في أبهى فترات نجاحها. وزي ما صرحت كانت غيرة فؤاد المهندس عليها كانت لا بكل جوانبها وده كان بيسبب مشاكل وخناقات كتير جدا وصلت أحيانا للتمادي بالضرب من الطرفين. وده أدى في النهاية للانفصال الرسمي. 

وأثبتت السجلات إن شويكار تزوجت بالسيناريست مدحت حسن بس هي مقالتش أي حاجة تخص العلاقة والزيجة دي. على الأغلب الزوج كان عنده رغبة في ان الزواج يكون سر. 

وعلى عكس نجوم كتير في جيلها، استمرت شويكار في التلون والتنوع بأعمالها ومتمسكتش بدور البطولة وشاركت في أفلام ومسلسلات كتير بدور تاني وسط مجموعة من النجوم الأصغر منها في العمر زي فيلم أمريكا شيكا بيكا ومسلسل امرأة من زمن الحب. والجدير بالذكر أن اخر اعملها كان ظهورها في مسلسل "سر علني" سنة 2012 مع الفنانة غادة عادل.