بتحب تحليل المواقف وعقلها دايما شغال طول الوقت صعب انه يفصل، وبالرغم من ان التفكير الكتير ده بيبان كأنها مترددة الا انها قاطعة جدا في اتخاذ قراراتها، ماتحبش الاستقلال والوحدة بالعكس هي دايما تحب تاخد رأي اللي بتحبهم وتحس بدعمهم لها طول الوقت، ماهرة جدا في حل المشاكل، تعرف كويس جدا ازاي تحدد اهدافها وازاي تكون صادقة وواضحة في رؤيتها لكل شيء اخر صفة ممكن تبقى فيها هي الاندفاع وده لأنها لازم تفهم وتحلل اي موقف قبل ما تحط نفسها فيه، بتعشق النظام والترتيب والتأنق، كل الصفات دي بتنعكس عليها في اختيار لبسها وبتحدد ملامح استايل هدوم انثى برج العذراء

الرقة والهدوء

انثى العذراء مش مهووسة اوي بتقاليع الموضة لكن دايما بتميل للموديلات الكلاسيكية الهادية، وتحب الهدوم المتفصلة على مقاسها مظبوط والخامات الغالية الغنية الطبيعية وبتتجنب الخامات الصناعية على اد ما تقدر، اما الوانها المفضلة فهي الدرجات الترابية البيجات والباستيلات وبتعتبر الاكسسوار من اساسيات طقم الخروج بتاعها

الاطلالة المثالية

من الحاجات الظريفة جدا اللي بتميز اللوك او الاطلالة الخاصة بأنثى العذراء هي انها بتظبطها على المسطرة بمعنى ان هي تعرف ازاي تعمل اطلالة فورمال جدا من غير ولا علطة وبرضه لما تيجي تلبس الكاجوال او حتى الهيبي بتظبطها على المسطرة من غير ولا غلطة، وده لدقتها الشديدة في مراعات التفصيل والبحث عن الكمال في كل مهمة بتقوم بيها، يعني ما بتعرفش خالص تخلط بين استايلين لبس مختلفين او تلبس حاجة تنفع كاجوال وكلاسيك في نفس الوقت يا اما فورمال يا اما كاجوال مش بتقبل الوسط

الثقة من البساطة

انثى العذراء بتحس بالثقة في نفسها كل ما كانت اطلالتها بسيطة وغير لافتة للانظار على اد ما تقدر، ودي اكتر حاجة بتأثر عليها وهي بتختار لبسها لأنها بتبعد على اد ما تقدر عن الموديلات الجريئة او الهدوم الضيقة جدا وبرضه بتبعد عن الالون المطرقعة او التريندات الملفتة، دايما بتميل للبساطة والهدوء ومن هنا بتستمد ثقتها في نفسها واحساسها بالراحة.

انثى العذراء والكاجوال

من اكتر النقشات اللي بتحب تلبسها المقلم والكاروه، اما البنطلون فمن النادر جدا انه يكون باجي او واسع لأن انثى العذراء بتفضل البنطلون الكلاسيكي اللي متفصل عليها مظبوط ولا الضيق اوي ولا الواسع اوي، وممكن تختار جاكيت او كارديجان متفصل كويس عليها عشان تكمل بيه اطلالتها، وصعب اوي انها تلبس الاستايل الاوفر سايز

انثى العذراء والسهرات

انثى العذراء مش بتتخلى عن ميلها للهدوء والبساطة والموديلات الرقيقة حتى في اختيار اطلالة السهرة بتاعتها، وده عشان هي اصلا مش بتحب التجمعات الكبيرة ولا الحفلات الصاخبة ، وعشان كده هي غالبا بتختار موديل شيك ورقيق ولون مش مفرقع واكسسوارات انثوية جدا حتى في الاحذية اللي مش بتحبها تكون ملفتة جدا على اد ما تحبها تكون رقيقة وانيقة وكلها انوثة

الاكسسوارات

في حاجتين بتعبرهم انثى العذراء من الاساسايات في اكسسواراتها وهما الحزام والساعة، وده  بيعتبر من اكتر السمات المشتركة بين مواليد العذراء دايما بتحب تختار الموديلات اللي لها حزام من الوسط او تنسق هي حزام مع الموديل بتاعها، اما حبها للساعة فده لاهتمامها بالوقت ودقة المواعيد، اما المجوهرات بتاعتها فغالبا من الفضة واللؤلؤ وبتختار الاكسسوارات عشان تدي مظهر شيك ومتأنق لطقم الهدوم بتاعها لكن مش بهدف لفت النظر عشان كده ماتحبش تلبس المجوهرات كبيرة الحجم

محدش يقدر ينكر ان الذوق بيفرق من شخص لشخص وان في عوامل كتير اوي بتتدخل في موضوع استايل اللبس ده لكن بشكل عام دي كانت السمات المشتركة اللي بتميز استايل هدوم انثى العذراء وممكن كمان تدخلي هنا وتعرفي كل حاجة تخص برج العذراء.