إتولد في الإسكندرية يوم 8 فبراير سنة 1933. إتخرج من كلية الآداب جامعة إسكندرية .

إشتغل لفترة محصل فواتير في شركة الكهرباء.

من خلال مسيرته الفنية اللي دامت حوالي 37 سنة قدم حوالي 150 عمل فني .

إكتشفه المخرج نيازي مصطفى وقدمه من خلال فيلم "عنتر يغزو الصحراء" سنة 1960 مع الفنان حسن يوسف ومن بعدها لفت نظر المخرجين وكانوا بيرشحوه في أدوار كتير لكن معظمها كانت أدوار شر بسبب ملامحه الحادة وصلعته المميزة لكن اللي كان بيميزه عن غيره إنه كان بيضيف روح الفكاهه في أدواره زي دوره في فيلم " 30 يوم في السجن "مع الفنان أبو بكر عزت ، عصابة حمادة وتوتو مع الفنان عادل إمام ولبلبة ، " أنا اللي قتلت الحنش " مع الفنان سعيد صالح، شنبو في المصيدة ، والغول "

وعن مسرحياته " شاهد ماشفش حاجة ، الخوافين ، البلدوزر ".

من أبرز المسلسلات اللي شارك فيها "الكابتن جوده ، أعقل يا مجنون ، الكعبة المشرفة ، محمد رسول الله ، الإمام مالك ، أحلام الفتى الطائر "

كل اللي إتعامل مع الفنان نصر سيف من مخرجين ومنتجين وفنانين كلهم أجمعوا إن قلبه طيب وحنين جدًا .

وكتير من نقاد الفن قالوا إن الدور اللي قدمه من خلال مسرحية شاهد ماشافش حاجة أضاف ليه كتير في مشواره الفني وإن الكومبارس لما يكون في فيلم أو مسرحية أو مسلسل ويقول نكته أو جملة بأداء معين بيفضل موجود في أذهان الناس يعني مش الكومبارس هو الشخص اللي بيبقى متداري أو كماله عدد في العمل بالعكس أوقات كتير بيبقى وجوده مؤثر .

آدي فريضة الحج سنة 2010 وبعدها إعتزل التمثيل .