الفنان سيد عبد الكريم موهبة فريدة من نوعها وعنده قدره هائلة على تجسيد الشخصيات المختلفة ، فجسد دور المعلم شعبي في مسلسل "ليالي الحلمية" و أستاذ جامعي في "أهالينا" وتاجر سمك.

مابيعرفش يقرأ ويكتب في "الرايا البيضا" وفي كل دور بيجبرنا بموهبته وإتقانه إننا نعيش معاه الشخصية . هنستعرض معاكم إزاي قدر سيد عبد الكريم يتحول من دكتور في الجامعة للممثل محترف والسبب اللي جعلة يكسر كلمة والده وكمان سبب وفاته. 

‎ في الإسكندرية يوم 26 يوليو سنة 1936 إتولد السيد حلمي عبد الكريم والده كان بيمتلك قهوة في منطقة سيدي جابر . . 

بدأ حبه للتمثيل من صغره فكان بيقلد والده وبيلبس هدومه بطريقة مميزة فكان بيثير دهشة أخواته وأصدقائه ولما دخل المدرسة الإبتدائية شارك في فريق التمثيل وقام ببطولة كتير من المسرحيات وكان محبوب من أصدقائه بسبب خفة دمه وكمان لطيبة قلبه. 

 إنتقالا لمرحلته الجامعية دخل كلية الزراعة جامعة الإسكندرية وكان سيد عبد الكريم دايمًا بيستمع لنصائح الفنانين الكبار اللي كانوا بييجوا من وقت للتاني لمشاهدة العروض المسرحية بالجامعة وإتخرج من كلية الزراعة قسم الآفات بتقدير جيد جدًا مع مرتبة الشرف وحصل على منحه دراسية للحصول على الدكتوراه من ألمانيا وإتعين دكتور في الجامعة وإشتغل فترة فيها بناءا علي رغبة والده اللي عارض إحترافه الفن لكن حبه للفن جعله يتنازل عن كل حاجة في سبيل التمثيل . 

 ودخل بعدها معهد السينما قسم إخراج وسيناريو واتخرج منه سنة 1974. 

وإتعرف في المعهد على المخرج محمد فاضل وبقوا أفضل أصدقاء و بمرور الوقت إتقابلوا الإتنين بالمخرج نور الدمرداش اللي كان دايمًا بيشجعهم إنهم يركزوا في الفن. 

 سيد عبد الكريم إتعرف فى الوسط الفنى بإسم المعلم زينهم السماحى غامر في أول مسلسلاته وجسد شخصية "عربجي" في مسلسل "النصيب"، والشخصية دي بعيدة تماما عن طبيعة مهنته الأساسية ومع إحترافه و إتقانه للدور نجح بشدة وتوالت عليه الأعمال الفنية . 

 شارك فى كتير من المسلسلات منها "أهل كايرو ، وعد ومش مكتوب ، قلب ميت ، حدائق الشيطان ، كناريا وشركاه ، الأصدقاء ". ويعتبر مسلسل «ليالى الحلمية» هو من أهم مسلسلات سيد عبد الكريم ، جسد فيه شخصية المعلم زينهم السماحى وده الإسم اللي إتشهر بيه بين جمهوره وأصبح علامة فى تاريخه. 

 من أعماله السينمائية فيلم " حرامية في تايلند ، المهاجر ، ليه يا بنفسج ، اشتباه ، العودة والندم ، جدعان باب الشعرية ". 

 توفى الفنان سيد عبد الكريم يوم 31 مارس سنة 2012 بسبب أزمه قلبية بعد معاناة مع مرض القلب إستمرت 5 سنين وإصابته بفشل كلوى وجلطات بالمخ.