عن دورها في فيلم الإرهاب والكباب مع الفنان عادل إمام قالت إنها راحت لعادل إمام وقالتله إنها خايفة منه وخايفة تشتغل معاه رد عليها الزعيم وقالها إنتي اللي شكلك يرعب ومن هنا بدأ الحاجز بينهم يتكسر وبعدها قالتله طيب عايزه أبوسك قالها إتفضلي وبعد لما باسته قالها عكيتي الدنيا . 

إسمها بالكامل عائشة الكيلاني محمد .

 إتولدت في القاهرة يوم 28 فبراير سنة 1954. 

حصلت على بكالوريوس خدمة إجتماعية وبسبب حبها للفن دخل المعهد العالي للفنون المسرحية قسم التمثيل . 

وكانت أول بدايتها "مسرحية البرنسيسة "مع الفنان فاروق الفيشاوي والفنانة ليلى علوي ، وبعدها عملت أدوار كتير في المسرحيات والسهرات التلفزيونية .

 ولما كانت في أول سنة ليها في المعهد استعان بيها الفنان فؤاد المهندس في عروض مسرحية " سك على بناتك " بدل من الفنانة " سناء يونس " وحذرها وقالها إنها هتتعرض للضرب كتيير وافقت جدًا وقالت "إشتغلت معاه 3 شهور وكل الناس كانت بتعلمني " وشكرها الفنان فؤاد المهندس وقالها إنتي انقذتينا كنا هنلغي لحد لما سناء يونس ترجع . 

من أهم أعمالها السينمائية " المنسي ، الشيطانة التي احبتني ، الإرهاب والكباب ، سمك لبن تمر هندي ، كيد العوالم ، المطب ". 

 أما عن أعمالها التليفزيونية " العطار والسبع بنات ، أرابيسك ، حد السكين ، حكايات مجنونة " .

 وكان آخر أعمالها مسلسل " أبو ضحكه جنان " سنة 2009 مع وجسدت وقتها جدة الفنان إسماعيل ياسين . 

وقالت كمان إن من بعد المسلسل متعرضش عليها أدوار كويسة واللي كان بيتعرض عليها مشهد ولا إتنين في مسلسل وطبعًا مش هتهين نفسها فقررت تقعد لحد لما تلاقي الدور اللي يستاهل إنها تلعبه.