اسمها بالكامل فايزة محمد كمال.
إتولدت يوم 1 يناير سنة 1962 في الكويت لان والدها ووالدتها كانوا بيشتغلوا هناك، وعاشت كل طفولتها في المدارس الكويتية.
ورجعت مصر وهي عندها 16 سنة بعد لما أنهت الثانوية العامة، وقررت دخول المعهد العالي للفنون المسرحية، ولكن اعترض والدها لإنه كان عايزها تكون مهندسة ديكور، وبسبب عشقها الكبير للتمثيل وإصرارها، توسط لها الفنان سعد أدرش عند والدها وأقنعه علشان يوافق إنها تكون ممثلة، وبالفعل تتلمذت على إيده، هو وسناء شافع وأحمد عبد الحليم وفتحي الحكيم.
وبدأت مشوارها الفني وهى في السنة الأولى من المعهد فشاركت في مسلسل تاريخي اسمه "العدل والتفاح" مع الفنانة مديحة كامل وعبد الله غيث، ومن بعدها توالت أعمالها وأصبحت واحدة من أهم نجمات فترة الثمانينيات والتسعينيات وشاركت في أعمال مميزة، منهم فيلم "ضحية حب" "قسمة ونصيب" "الطائرة المفقودة" و"منتهى العطف".
وكمان شاركت في كتير من الأعمال التاريخية والدينية منهم "عصر الأئمة"، "ملكة في المنفى" "محمد رسول الله" وغيرهم.
وإنتقالا لحياتها الخاصة
فتزوجت من المخرج المسرحي "مراد منير" وبدأت قصة حبهم لما شافها زوجها لأول مرة وهى بتتعاقد على مسرحية "الملك هو الملك"، وقام هو بإخراجها، ووقتها مالفتتش نظرة كأنثى لأنه مش بيفكر بالطريقة دي مع اللي بيتعامل معاهم بحسب مذكراته، وفي أول بروفة لما سألت فايزة عن الأغاني الخاصة بالمسرحية إتعامل معاها مراد بقسوة، وقبل العرض بأيام راهنه الفنان صلاح السعدني بأنها هتكون أسوأ حاجة في العرض ولكن مراد منير قاله إنها هتكون كويسة جدًا بالفعل كسب الرهان، وكانت فايزة كمال أروع ما في العرض.
ومرت الايام وقرروا الزواج وده بعد لما أعلن إسلامه، وبسبب خبر زواجهم ظهرت ضجة كبيرة عن حقيقة ديانة زوجها مراد.
وتدخلت أخته " ماجدة منير " لإنهاء الجدل وقالت “ليه تصدروا أحكام، وعلاقه البنى آدم بربه دي علاقة خاصة جدا، ومش من حق أي حد يتدخل فيها، وإكدت أن أخوها مراد أسلم علشان يتزوج من فايزة كمال، و أولادهم يوسف وليلي مسلمين.
وبمجرد انجاب الفنامة فايزة لبنتها ليلى، قررت إنها تاخد إجازة بعد عملها المتواصل في الفن لمدة 16 سنة وخصوصًا إنها ولا مرة أخدت إجازة أو راحة حتى بعد ولادة إبنها الكبير يوسف وده خلاها تحس بالذنب الكبير تحيته، فقررت إنها تعوضه عن غيابها مع ليلى أخته وتهتم بأسرتها لفترة.
وبعد سنتين من غيابها رجعت تاني لعشقها الأساسي وهو التمثيل.
واثناء تقديمها لشخصية السيدة نفيسة في مسلسل تليفزيوني، طلبوا موافقة الأزهر الشريف، وبالفعل وافق الأزهر بعد لما تأكد إن الممثلة اللي هتقدم الشخصية بتتمتع بسمعة طيبة وتاريخ مشرف وده اللي أسعد فايزة كمال.
وللاسف أصيبت فايزة بمرض سرطان الكبد، ودخلت بسببة العناية المركزة في القصر العيني، وتوفيت يوم 26 مايو سنة 2014، عن عمر يناهز 52 سنة.
وبعد وفاتها كشف زوجها المخرج مراد منير وقوعها لموقف غريب عليها وعلى أخلاقها وتربيتها، وهو تعرضها للإضطهاد من ثري خليجي بعد لما عرض عليها شقة 600 متر في سبيل إنها تخون زوجها معاه، ولكن فايزة رفضت رفض قطعي، وأكد زوجها إن بسبب إضهاد الخليجي ليها لم تصبح نجمة كبيرة عكس باقي نجمات جيلها.