إختارت أهم حاجة في حياتها إنها تكون أم وسابت التمثيل وغابت عن الساحة الفنية لمدة دامت 17 سنة قالت إنها مش ندمانة أبدًا وإن الست إتخلقت علشان تكون أم ولو حصل أي مقارنة بين بيتها وأولادها وأي حاجة تانية هتختار بيتها هى الجميلة سوسن ربيع هنعرف مع بعض النهاردة مين السبب اللي خلاها تدخل عالم التمثيل وكانت فين الفترة اللي فاتت دي كلها وهل لزوجها يد في بعدها عن التمثيل. إسمها بالكامل سوسن إبراهيم ربيع . إتولدت في القاهرة يوم 7 يونيو سنة 1962 .

بالرغم من عشقها للفن لكنها دخلت كلية الآداب قسم إجتماع وقالت إنها إستفادت كتير جدًا من دراستها للعلوم الإنسانية في شغلها بالتمثيل.

صرحت في برنامج إن السبب في دخولها لعالم التمثيل هو والدها لإنه كان بيعشق الفن وسعى إنه يدخل مجال التمثيل لكن مانجحش فيه فقرر يدخل أبنائه كلهم بدأت هى وأخواتها الصبيان من خلال برامج الأطفال زي "يلا نغني" و"مسرح الأطفال" ورشحها الفنان الكبير فؤاد المهندس علشان تشارك في مسلسل إذاعي إسمه "عائلة مرزوق" وده البرنامج اللي رجعتله بعد غيابها 17 سنة عن الساحة الفنية.

إترشحت للمشاركة في سباعية "الناس والفلوس" من إخراج إسماعيل عبد الحافظ المخرج الكبير وبعدها مسرحية "نرجس" قدام الفنانة سهير البابلي ومن بعدها بقت معروفة وتوالت عليها الأعمال وقدمت كمان مسرحية "إنها حقا عائلة محترمة" .

 

وتميزت في أفلام من بطولة الزعيم عادل إمام منها "على باب الوزير" و "خلى بالك من عقلك" .

قالت الفنانة سوسن على بعدها عن مجال الفن لمدة 17 سنة إنها محستش بالندم أبدًا ولا يوم لإنها إتفرغت لتربية أطفالها وتهييئ جو أسري مناسب ليهم كله دفء وحنان وعطاء وإنها أدت رسالتها بتخرج إبنها وبنتها من كلية الإعلام .

وعن حياتها الخاصة تزوجت من الكاتب الصحفي رفاعي شوقي وعندها ولد وبنت " محمد ومنة " ووضحت إنه ممنعهاش إنها تكمل مشوارها الفني لكن ظروف شغله فرضت عليه إنه يسافر ويستقر برة لسنين فكان لازم هى اللي تضحي بشغلها في سبيل إنها تحافظ على ترابط أسرتها ، ورجعت لمصر سنة 2010 لكن مااشتركتش في أي عمل لحد سنة 2016 وده كان بسبب أزمه صحية إتعرضت ليها .

وعن قرار عودتها للتمثيل قالت إنها هترجع تاني لممارسة عملها الفني اللي قدمت من خلاله أحب الأعمال لقلبها سواء من خلال المسرح أو من السينما والتليفزيون وبالفعل قدمت مسرحية " المتفائل " ومسلسل "زي الشمس " وغيرهم.