وعشان هى شخص بيتوتي اوي بعدت خالص عن الاضواء والتكريمات لدرجة أنهم راحولها البيت مخصوص عشان يكرموها وسلمها درع التكريم الأب بطرس دانيال، واللي كتير مايعرفوهوش أن الفنانة زهرة العلا هي خالة الفنان أحمد سعيد عبد الغنى، فبعد لما اتجوز الفنان الكبير سعيد عبد الغنى أخت الفنانة زهرة العلا انجبوا الفنان الشاب أحمد سعيد عبد الغنى والمفاجأة دي مش كتير من الجمهور يعرفها.

تعالوا بقى احكيلكوا عن أشهر قصة حب في الوسط الفني بين زهرة العلا والمخرج حسن الصيفي، وقبل ما احكيلكوا عن القصة، لازم الأول تعرفوا ان زهرة اتجوزت 3 مرات قبل ماتتجوز حسن. 

أول وتاني مرة كانت من جوه عيلتها والإتنين كانوا عايزينها تسيب الفن لكن هى كانت بترفض وكانوا بينفصلوا بعد فترة صغيرة جدًا، والمرة الثالثة اتجوزت صلاح ذو الفقار في السر وده كان إتفاقهم من البداية عشان يحافظ على مشاعر زوجته الأولى، وفضلوا متجوزين حوالي سنة لحد لما زهقت زهرة من الحياة السرية دي وطلبت الطلاق.

وحسن كمان كان متجوز قبل زهرة مرتين المرة الأولى من السيدة حياة محمد إسماعيل وأنجب منها المنتج المعروف عمرو الصيفي والمرة الثانية اتجوز السيدة رجاء يوسف.

نرجع بقى لحكاية زهرة وحسن الصيفي.

في الفترة دي كانت زهرة العلا عاملة قلق في الوسط الفني، رغم أنها مكنتش من بطلات الصف الأول، لكن كان بمجرد ماينزل الفيلم في السينما، بينجح ولازم تاخد هى الجايزة عن دورها مش البطلة.

وحسن الصيفي هو كمان وقتها كان شاب مساعد لانور وجدي وطلع هو كمان بسرعة الصاروخ وكان السبب الأساسي في نجاح أفلام إسماعيل ياسين زي (عفريتة إسماعيل ياسين، ونشالة هانم)، ومكنش هو وزهرة اتقابلوا قبل كده، لحد لما جمعهم فيلم (جمعية قتل الزوجات)”.

وبدأوا يقربوا ويحبوا بعض واتجوزوا، ونجحت جوازاتهم جدًا وبقت من اكتر الزيجات المستقرة في الوسط الفني وفضلوا متجوزين 45 سنة، وخلفوا أمل الصيفي اللي اتجوزت اخو الهام شاهين  ومنال الصيفي اللي اخدت مهنة والدها وبقت مخرجه كبيرة زيه.

وكان بيتهم بيت فني من الدرجة الأولى لدرجة ان كل يوم كان بيزورهم فنانين، وكان معروف في الوسط الفني أن فيلا حسن الصيفي في مصر الجديدة دي استراحة فنية مفتوحة 24 ساعة، لأي فنان، لحد لما اتحولت وقتها لأشهر بلاتوه تصوير، واتصور فيها أفلام كتير مشهورة.

وبعد 45 سنة من حياتهم مع بعض اتوفى حسن الصيفي، سنة 2005، وخبر وفاته كان صدمه كبيرة لزهرة، لدرجة ان جالها حالة من الانكار ومكنتش عايزة تقتنع ابدا انه مبقاش موجود في الدنيا.

وعاشت زهرة بعده 8 سنين وعانت وقتها من المرض لدرجة ان حصلها شلل وبقت نايمة في السرير مش بتتحرك، وحاولت نقابة التمثيلية تعالجها على نفقة الدولة لكن هى مكنتش موافقة ابدًا وكانت مصممه تتعالج بفلوسها الخاصة، لحد وفاتها يوم 18 ديسمبر سنة 2013 وكان عندها 79 سنة، وسابت وراها تاريخ كبير من الاعمال المميزة.