اشتهرت زينب باسم زينات صدقي في عالم السينما. وكانت خفيفة الظل جدا تحب المرح والضحك دايما. عشان كدة كانت بتضيف جزء مهم جدا في أي عمل تشارك فيه. ولو حاولنا نكتشف سر لقبها بالعانس هنلاقي إن الفنان القدير نجيب الريحاني حولها إلى عانس السينما المصرية وخلاها دايما في كل أدوارها تبحث عن الزوج المناسب. وده خلى عباراتها الشهيرة تثبت في أذهان كل الأجيال القديمة والحديثة زي "عوض عليا عوض الصابرين يارب و"عاوزة أتجوز يا ام كامل" "عدلهالى من عندك يا رب" "يا سارق قلوب العذارى"

زينات بدأت مشوارها الفني كمغنية باشتراكها في فرقة بديعة مصابني. وهربت من أهلها إلى الشام، وهناك اتعرفت على منتج أنتج ليها أغنيتها الشهيرة "أنا زينات المصرية خفة ودلع" وبعد فترة رجعت لمصر واتعرفت على الفنان نجيب الريحاني الي وقف جنبها وقدمها في احدى مسرحياته.

وبعد كدة توالت عروض التمثيل عليها، وأصبحت أيقونة حقيقية في السينما المصرية لدرجة إن تاريخها الفني تجاوز 400 فيلم من أشهرهم "عفريتة إسماعيل ياسين وعاوزة اتجوز والانسة حنفي والعتبة الخضرا وحلاق السيدات ومعبودة الجماهير والقلب له أحكام وأيامنا الحلوة وشارع الحب اللى إشتهرت فيه بحرم حسب الله السادس عشر" 

وفي وسط سطوعها في عالم الفن تزوجت أحد الضباط الأحرار في السر لكن العلاقة لم تدوم طويلا لأسباب مجهولة بالرغم من أن كان في قصة حب كبيرة بتجمع بينهم. 

اللى كتير من الجمهور ميعرفهوش إن زينات كانت بتجمعها علاقة صداقة مع الرئيس الراحل أنور السادات. في الفترة الي انطفت فيها نجوميتها وقلت أدوارها بسبب تقدمها فى العمر، اتصل بها الرئيس أنور السادات ليبلغها بتكريمها في عيد الفن سنة 1976 وكمان دعاها لحضور حفل زفاف ابنته ولكنها اعتذرت عن الحضور لأنها مبتمتلكش ملابس لائقة للخروج لجمهورها مرة تانية بعد غياب طويل. 

وبعد سنتين بس من حضورها للتكريم رحلت عن عالمنا القلب الرقيق والبساطة والضحكة التي ملأت وجوهنا. رحلت زينات صدقي عن عالمنا سنة 1978 بعد معاناة مع المرض.