يعتبر الفنان "سيد صادق" هو من أهم الفنانين اللي اشتهروا بأدوار الشر وتميزوا فيها، ومثل عشرات الأدوار بعبقرية، خصوصا فى التلفزيون اللي كان سبب رئيسي في معرفة الشارع بيه، وعلى الرغم من انه لم  يشارك في أعمال فنية كتير إلا أنه قدر يسيب بصمة في تاريخ السينما المصرية وفضل موجود في عقول محبيه، حتى بعد اختفائه عن الساحة من سنوات ومارجعش تاني حتى وقتنا هذا. 

اتولد الفنان "سيد صادق" سنة 1945 وعشق التمثيل من صغره فكان بيشارك في المسابقات الفنية أثناء دراسته في المدرسة الثانوية وكان من أصدقائه في المدرسة"محمد جابر، ونور الشريف"، وكانوا من المنافسين ليه. 

وبعد لما انهى المرحلة الثانوية قرر انه يحقق حلمه وقدم ملفه في معهد الفنون المسرحية، ولأنه من أسرة متوسطة كان لازم يشتغل بجانب دراسته في المعهد علشان يعرف يصرف على نفسه وعلى دراسته. 

واشتغل في مسرح الحكيم وبعد لما قدم 12 عمل واستقرت أوضاعه المادية، كلم صديق ليه في المجال الفني ليتوسطله، وبالفعل شارك في إحدى المسرحيات وبعدها طلبوه للمشاركة في "مسرحية عيون "سنة 1980 مع الفنان الكبير "فؤاد المهندس" ومن بعدها ذاع صيته وشارك في كتير من الأعمال السينمائية والتلفزيونية. 

وقدم مسلسلات مميزة منها الحاوى، ليالى الحلمية، رأفت الهجان، ساكن قصادى، لن أعيش فى جلباب أبى، السيرة الهلالية، العطار والسبع بنات.

أما آخر أعماله هو مسلسل "أستاذ ورئيس قسم" سنة 2015. 

وبعد اختفاءه عن الفن كرس حياته للعمل في التجارة والاستثمار فهو صاحب محل "خردوات"، وصرح انه بيحمد ربنا كل يوم انه اشتغل شغلانه غير الفن لانه لو مكانش بيشتغل كان زمانه دلوقتي بيجمع التبرعات. 

وصرح "سيد صادق" عن سبب اختفاءه عن الفن واتجاهه للعمل في شئ بعيد عن التمثيل وهو ان الامر كان خارج عن إرادته وانه قضى 50 سنة من عمره في الفن، وحس انه من الجيل اللي راح زمنه، ودلوقتي الجيل غير الجيل، وأكد إنه مَش بيفكر فى الاعتزال إطلاقاً لان التمثيل مش عيب، لكن العيب هو أن يخبط على باب المُنتجين أو المُخرجين، وحد فيهم يقفل الباب فى وشه. 

ووجه رسالة للمُخرجين الشباب: «افتكرونى.. أنا حي أرزق.. واللي هيطلبنى فى دور هشرفه ومش هعرضه للحرج.. الجمهور مشتاق لرؤيتى.. وهظهر بكامل قوتى وكمان بشكل مختلف». 

أما عن علاقته بالفنان عادل إمام قال انه من أكتر  الفنانين اللي اشتغل معاهم، وكشف عن موقف من المواقف اللي جمعتهم "فى فيلم خلى بالك من عقلك" فكان عادل إمام بيشتغل معاه فى البار، وكانت بينهم اشتباكات بالأيد، فبدون قصد ضربه الزعيم ضرب حقيقية ولكن بعد انتهاء المشهد، جري عليه عادل امام بسرعة عشان يطمئن عليه. 

وأضاف أنه هو كمان ضرب الفنان نور الشريف، عن غير مايقصد، فى فيلم «الفتى الشرير»، وقال: اللكمة مكانتش مقصودة تماماً، لكن نور الشريف تعرض لنزيف في الأنف، وبعد المشهد اعتذرله، وتفهم نور الشريف الموقف. 

وصرح أن أبناءه مالهمش علاقة بالوسط الفنى، باستثناء ابنه المؤلف لؤى سيد، وأضاف إنه إتفاجأ بإن ابنه أصبح مؤلف وليه أفلام وبرامج، وهو مؤخرا ييتعاون مع رامز جلال فى فيلم جديد وده بجانب كتابته لبرنامج المقالب الخاص به، وأكد انه مش بيتدخل في شغله إطلاقاً. 

وحرص ان يدخل ابنه فى مجال التجارة وفتح ليه محل على الرغم من نشاطه الفنى الكبير، عشان تكون التجارة هى الظهر اللي هيتسند عليه ويعيش فى أمان، ومايحتاجش يلجأ لأي شخص في يوم من الايام.