من فينا مش فاكر فيلم الدادة دودي اللي قدمته الفنانة ياسمين عبد العزيز، سنة 2008، وحقق وقتها نجاح كبير، ولحد دلوقتي الفيلم بيحتل مكانة كبيرة في قلوب الأطفال، وشارك في بطولة الفيلم عددٌ من الأطفال، منهم الطفلة دينا وهى البنت الكبيرة والقائدة بين اخواتها، واللي جسدت الدور دة هي الممثلة "نورا الفولي". 

ظهورها المميز بعد مرور 13 سنة على فيلم الدادة دودي، وسبب اختفائها عن الشاشة. 

بعد مرور حوالي 13 سنة على عرض الفيلم ظهرت من جديد الممثلة نورا الفولي من خلال مسلسل " خلي بالك من زيزي " في رمضان 2021 بالتحديد في الحلقة 23. 

وخطفت نورا أنظار المشاهدين في مشهد استمر حوالي دقائق معدودة، وجسدت فيه دور أم الطفلة المتنمرة ساندي، ووقفت في المشهد أمام  مجموعة من الفنانين وهما "محمد ممدوح، وعلي الطيب، وأمينة خليل، وأسماء جلال ومروان يونس" وكانت بتدور على حق بنتها  في المستشفى بعد لما أصابتها ريم عبد القادر بإصابة كبيرة في راسها. 

وعلى الرغم من ان المشهد كان قصير لكن بدأ الجمهور يربط بين الطفلة دينا في فيلم الدادة دودي والمراة الناضجة والدة ساندي، وتردد بعضهم هل هى فعلا ولا مجرد تشابه ملامح. 

ولكن نورا الفولي ظهرت بنفسها وحسمت الخلاف  وأكدت انها فعلا ظهرت في الحلقة الـ 23 من المسلسل واضافت ان ظهورها كضيفة شرف بعد لما تواصل معاها المخرج كريم الشناوي، وطلب منها المشاركة في العمل ووقتها وافقت على طول. 

وعبرت عن فرحتها بتجسيد دور الأم واضافت انها مكانتش قلقانه ابدا من انها تلعب الدور وهى مؤمنة ان الممثل الشاطر يقدر يجسد اي دور هو عايزة ومش بس كده كمان ثقتها الكبيرة في المخرج كريم الشناوي لأنه مخرج بيحب شغله وبيحب يظهر الممثل في أفضل صورة. 

ووضحت نورا أنها مش اول مرة تتعاون مع كريم الشناوي، وانها اشتغلت. معاه ومع الشركة المنتجة في  عدد من الأعمال منهم" مسلسل قابيل ومسلسل اتنين في الصندوق". 

وعن سبب غيابها  الفني وضحت أنه كان بسبب دراستها وكمان العروض اللي كانت بتتعرض عليها مكانتش مرضية بالنسبالها. 

أما عن مشاريعها المستقبلية، فأكدت أنها لسه في  بداية الطريق، وبتسعى انها تطور موهبتها بالورش التمثيلية، لانها مؤمنة ان التمثيل مش بس موهبة كمان بيحتاج للدراسة، وخصوصًا أن مجال دراستها بعيد كل البعد عن الفن، فهى تخرجت من كلية الألسن قسم اللغة الألمانية. 

وبعد تخرجها اشتغلت في مجال العقارات اللي تقريبًا بيستحوذ على أغلب وقتها. 

ومن خلال ظهورها مع النجمة اسعاد يونس في  برنامج “صاحبة السعادة” كشفت نورا عن كواليس فيلم "الدادة دودي” وقالت وقتها ان شخصية “دينا” كانت صعبة بالنسبالها، وده لان شخصيتها تختلف تمامًا عن شخصية دينا فهى في طفولتها كانت هادية جدًا ومش بتحب تعمل مشاكل، وأضافت إن الفنان صلاح عبد الله كان طول الوقت خلال التصوير بيتعامل معاهم كلهم.