الفنانة شهيرة محمود ياسين حب عمرها وإعتزلت الفن علشان تصلي وشقيقتها مذيعة مشهورة
الفنانة شهيرة أثارت الجدل بعد ظهورها بشعرها، وإعتزلت الفن علشان تصلي، ورفضت تدخل الممرض لزوجها محمود ياسين في آواخر أيامه.
إتولدت عائشة محمد أحمد حمدي في الشرقية، يوم 1 فبراير سنة 1949 ومن صغرها كانت شهيرة بتعشق التمثيل، وفي يوم وهى في المدرسة تعبت زميلتها اللي كانت بتقدم دور البطلة في المسرحية.
فجرت شهيرة علي المدرسة وطلبت منها تمثل هى الدور، وبعد إلحاح منها وافقت المدرسة وعملت شهيرة الدور، طبعًا فاجأت الكل بأدائها لدرجة أنها بقت البطلة الوحيدة لكل العروض المسرحية اللي كانت بتتقدم في المدرسة.
وزي ما انتوا عارفين مش كل حاجة بتمشي زي ما إحنا عايزين، فبعد ما خلصت المرحلة الثانوية كانت عايزة تدخل معهد الفنون المسرحية لكن والدها رفض تمامًا، وطلب منها تدخل كلية الحقوق، وهى سمعت كلامه ودخلت الكلية، وبعدها بفترة اتوفى والدها ومكنتش لسه إتخرجت من حقوق.
ولانها مكانتش بتحب الكلية دي، سافرت القاهرة بعد وفاة والدها وحققت حلمها ودخلت المعهد العالي للفنون المسرحية، وأخدت المركز الأول في إمتحانات القبول للبنات، وفي نفس الوقت أخد احمد زكي هو كمان المركز الاول للشباب.
وهى في سنة اولى كانوا أصحابها بينادوها بشوشو حمدي، فغيرت إسمها لشهيرة وبقى ده إسمها اللي إتشهرت بيه، وفي الفترة دي رشحها المخرج مدكور ثابت للمشاركة في فيلم صور ممنوعة بطولة محمود ياسين.
طبعًا محمود ياسين مكنش يعرفها ولا حتى يعرف إسمها ولما عرف أنها لسه مبتدئة في الوسط الفني، الدنيا إسودت في وشه، وفين وفين على ماوافق إنها تشارك معاه في الفيلم.
بس اللي حصل وقتها لا كان على البال ولا الخاطر، أول لما بدأوا يمثلوا مشهد وإتنين حس محمود بالارتباك قدامها، وحس أنه وقع في حبها، وكان بعد التصوير بيوصلها البيت وكان بيحاول يلاقي أي موقف عشان يتقرب منها، ويادوب أول لما انتهى التصوير كانت شهيرة هى كمان وقعت في حبه، خصوصًا انها كانت وحيدة بعد وفاة والدها.
في الوقت ده أحمد زكي كان قريب من شهيرة ومعتبر نفسه أخوها، فحكيتله شهيرة عن مشاعرها، وراح أحمد زكي لمحمود ياسين وإتكلم معاه أن الموضوع يكون رسمي.
وفعلا إتخطبوا 9 شهور وبعدها على طول اتجوزوا، وخلفت شهيرة رانيا محمود ياسين الفنانة المشهورة، والكاتب والفنان عمرو محمود ياسين
ومن بعدها بقوا ثنائي ناجح في السينما وقدموا أفلام كتير مع بعض وأسسوا شركة إنتاج إسمها أفلام محمود ياسين، وأنتجوا من خلالها أفلام كتير ناجحة ولعبت شهيرة دور البطولة
ومكنوش ناجحين بس في الفن كمان كانوا من أنجح قصص الحب بين الفنانيين، وكانت شهيرة معروف عنها أنها بتغير جدًا على محمود ياسين، ومكنتش بتسمح لأي يضايقهم، ولكن ده حصل مرة واحدة واتطلقوا لكن على طول رجعوا لبعض، وهو لما كان يلاقيها بتغير كان يقولها المقص اللي بيقص ضوافرك بيهم كلهم، وهى طبعًا كانت بتفرح.
تعالوا نروح لمشوارها الفني ونرجعلهم تاني.
كانت شهيرة صديقة مقربة جدًا من الفنانة شادية وكانت تقريبًا أقرب واحدة ليها، لدرجة إنها أعادت تلاتة من افلامها، "فيلم المرأة المجهولة"، وشهيرة قدمته باسم " ضاع العمر ياولدي" وكمان "فيلم الطريق" وشهيرة قدمته بعنوان" وصمة عار"، والفيلم الثالث " اللص والكلاب" وقدمته شهيرة باسم " ليل وخونة".
وبعد لما خلفت شهيرة رانيا وعمرو، بعدت لفترة عن الأضواء، وكانت مهتمه أكتر ببيتها وأولادها، لحد لما في يوم أخدت قرار الإعتزال ولبست الحجاب، والخبر ده كان مفاجأة للكل خصوصًا زوجها محمود اللي عرف الخبر من الشغالة في البيت وهى بتزغرط.
إتصدم ساعتها وسالها هتقدر فعلا تبعد عن أكتر حاجه بتحبها، وهى أكدت له أنها هتقدر لانها في الفترة دي كانت حاسة أنها عايزة تقرب من ربنا اكتر وتقرا قران براحتها من غير ما حاجة تعطلها أو تاخد من وقتها مع ربنا، لانها كانت بتصلي بسرعة جدا عشان تلحق تصور أو تقرا إسكربت وده مكنش عاجبها وكانت حاسة أنها عاملة حاجة غلط.
وفعلا إعتزلت وعملت عمرة وحج أكتر من مرة لدرجة أن بقى إسمها بين أصحابها " الحاجه شهيرة"، ورغم كده مختفتش زي معظم الفنانان ماعملوا، فكانت بتظهر مع زوجها الفنان محمود في المناسبات.
لحد سنة 1996 قررت شهيرة تظهر مرة تانية للجمهور، بس المرادي عن طريق قناة إقرأ من خلال برنامج ديني، وطلعت وقتها عليها إشاعات أنها أخدت فلوس عشان تلبس الحجاب، لكن شهيرة قالت إنها سابت فعلا الفلوس والحاجة اللي بتحبها عشان ربنا مش عشان حد.
وبعدها بسنين أثارت الجدل بعد لما ظهرت بصور ليها بشعرها على السوشيال ميديا، لكن طلعت شهيرة وقالت أنها بقت من القواعد وأن مفيش حد هيبصلها فمفيش مشكله تبين شعرها أو جزء منه.
نرجع تاني لحكايتها مع حبيب عمرها زي ماكانت دايمًا بتقول عليه.
بعد لما إتعرض الفنان محمود ياسين للمرض لسنين طويلة وقفت جنبه وكانت رافضة أن أي حد يخدمه غيرها ولا حتى كانت بتقبل أن يجيله ممرض يقعد معاه، وفضلت تحت رجله بمعنى الكلمة لحد وفاته يوم 14 أكتوبر سنة 2020.
ولحد وقتنا ده شهيرة حاسة بالضياع بعد وفاة حبيب عمرها وأوقات كتير مش بتصدق أنه مات بتكلمه وتناديه وبتحس أنه بيرد عليها، هو قال عنها قبل مايموت أنها ست صالحة وهى لسه بتقول عليه لحد دلوقتي إنه راجل إستثنائي.. رحم الله الفنان القدير محمود ياسين، واطال الله في عمر الفنانة القديرة شهيرة.
إرسال تعليق