برج الجوزاء, التوأم الأبدي, الشخصية المتقلبة المثيرة للأهتمام اللي كل اللي حواليه بيحبوا يراقبوه ويتابعوا تغيراته المزاجية ويفضلوا لحد آخر وقت بيحاولوا يفهموه.

برج الجوزاء من 21 مايو لحد 20 يونيو تعالوا النهرده ندخل رحلة استكشاف برج الجوزاء ,إيه أسرار جاذبيته وسحره و لو شريكك جوزاء هنقولك على نصايح إزاي ممكن تتعاملي معاه.

رمز الجوزاء عبارة عن خطين طوليين موصولين ببعض.. الرمز مقصود بيه وصف التوأم وازدواجية الشخصية .

1- اللي في قلبه على لسانه :

من اهم مميزات البرج ده الصراحة, الجوزاء مش بيعرف ينافق أو يجامل ومش بيحب المنافقين والنمامين, دايما بيقول الحقيقة حتي لو كانت صعبة أو مؤلمة, عشان كده لو إنتي محتاجه رأي حد في موقف مهم يبقي أختاري شخص يكون برج الجوزاء, وأهم حاجه إنك متزعليش من الرأي اللي هيصارحيك بيه.

2- بيحب المغامرة والاثارة :

بما انه شخصية متقلبة هتلاقيه بيحب جدا حياة المغامرة وإنه يجرب حاجات جديدة ومثيرة, لو شريك حياتك جوزاء يبقى لازم تبقي دايما مستعدة إنه ممكن يخليكي تجربي حاجات مجنونة وتتعلمي حاجات جديدة عمرك في حياتك العادية ماكنتي هتفكري تجربيها.

3- حبهم للحرية :

الشخصية ده بتحب إن يبقى ليها مساحة حرية تعمل فيها اللي هي عيزاه ومعندهمش قابلية انهم يستحملوا الخنقة أو الضغط, اديله دايما فرصة إنه يكون عنده وقته الخاص وبكده هتحصلي على حياة رائعة معاه. 

4- الذكاء الشديد :

مش بالسهولة إنهم يثقوا في أي حد, وممكن تلاقيهم بيعملوا اختبارات وامتحانات للشخصيات اللي حواليهم عشان يعرفوا يفرقوا مين الشخص الحقيقي ومين المزيف.

بس بمجرد انك تنالي ثقته, هتكتشفي جزء غامض من شخصيته عمره ما هيبينوه لأي حد غيرك.

5- مليء بالمفاجأت :

بما انه ذكي وكاتوم و مش بيثق في اللي حواليه بسهوله وكمان بيحب التغيير وتجارب كل جديد, فأعملي حسابك إنك كل فترة هتتفاجئي بحاجة جديدة في شخصيته إنتي مكنتش تعرفيها عنه, والموضوع ده مستمر حتي بعد سنين عشرة وارتباط. 

لو إنتي في حياة شخص برج جوزاء “وده معناه إنك فعلا محظوظة ” لازم تفهمي إنك فيها عشان هو اختارك ومش عشان محتاجك… و خليكي عارفة إنك لازم تبذلي جهد كافي عشان تحافظي على العلاقة ديه لأنه فعلا شخص مختلف ويستاهل إنك تتعبي عشانه وفي النهاية هتحصلي على حياة معاه طويله ممتعه ومليئة بالمفاجأت  :)