يمكن يبان انه قوي وطبعه صعب واحيانا بيتفهم انه قاسي لكن في الحقيقة رجل برج الثور من الرجال اللي بيقدروا المشاعر والحب ومن الناس اللي عندهم احساس عالي تجاه الفن والموسيقى والادب والسينما، ومش بس كده هما كمان بيهتموا اوي بكل شيء مش ظاهري بمعنى انهم مش بياخدوا بالظاهر ابدا لازم يشوفو حقيقة الاشياء ويحسوا بيها، مشكلتهم بس انهم مش بيستحملوا يتجرحوا ولو اتوجعوا بجد وحد جالهم على نقاط ضعفهم فعلا بتظهر قسوتهم وبيتحولوا لشخصيات هجومية، واكيد الصفات دي بتنعكس على اختياراتهم في حاجات كتير ومن اهمها استايل هدوم رجل برج الثور

الخامات الغالية

رجل برج الثور بيحب الخامات الغالية والفخمة اوي وبيحب يلبس الهدوم اللي لها ملمس ناعم ومريح زي الاقطان الاصلية والكتان الناعم وممكن الحاجات اللي داخل فيها حرير او صوف طبيعي مش مصنع، ومن المعروف عنه مش بيحب يصرف ببذخ على الملابس عشان كده بيلف شوية قبل ما يشتري ومعندهوش مشكلة انه يحوش ويستنى الاوكازيون المهم انه يختار قطع مصنوعة كويس وخاماتها غالية وفخمة.

اختياراته في الكاجوال

رجل برج الثور بيحب يلبس على الموضة بس مش لدرجة انه يتابع احث التريندات وده عشان هو بشكل عام ذوقه اميل للكلاسيكيات، بيحب التي شيرتات المتفصلة بشكل جميل ومختلفة ومصنوعة من خامات جيدة ومميزة، وبيحب كمان يلبس البلوفرات المصنوعة من الصوف الناعم او القطيفةـ اما بالنسبة للقمصان فهو بيفضل القميص السادة وممكن يلبس مقلم او كاروه بس المهم عنده الالوان والخامات، هو بيحب اوي الالوان الموجودة في الطبيعة زي الازرق بدرجاته والاخضر الطبيعي مش درجات الباستاج طبعا غير درجات البني والبيج اما اللونين المفضلين اوي فهما الاسود والكاكي

اختياراته في الفورمال

رجل برج الثور بيهتم بالدراسة والعمل بشكل عام لأنهم بيمثلوا بالنسبة له مصدر الرزق والمعيشة ودي حاجات مقدسة بالنسبة له، وعشان كده بيهتم بمظهره في العمل بشكل خاص وبيشوف المفروض ازاي يكون في احسن مظهر ويدي افضل انطباع في مكان عمله، ولأن ذوقه اميل للكلاسيكي فهو بيلبس القميص والبنطلون والكرافت او البدلة الكلاسيكية على حسب طبيعة عمله وذوقه الشخصي المهم انه يعكس الجزء العملي من شخصيته

الاحذية

اهم حاجة بيشوفها رجل برج الثور في الشوز بتاعه هي ان الشوز يكون ضخم وعريض ويوحي بالقوة وممكن كمان يختار الشوز له نعل عالي شوية زي البووتس الضخمة ولو كوتشي مش بيفضل الاسنيكرز اد ما بيحب يلبس كوتشي ضخم شوية، ومن ناحية الالوان وطبعا لأنه من اصحاب الذوق الكلاسيكي فهو بيختار الاسود والبني ونادرا ما بيختار لون تاني زي مثلا البترولي الغامق او الهافان لكنه بيستصعب يلبس اي لون في الشوزات.

موضوع اختيار الملابس ده بيدخل فيه عوامل مختلفة مش لازم كل مزاليد نفس البرج يلبسوا زي بعض بالظبط لكن في مجموعة من الصفات المشتركة اللي بتميز استايل هدوم رجل برج الثور وممكن تدخلوا هنا عشان تعرفوا كل حاجة تخص برج الثور