إتولدت في لبنان يوم 17نوفمبر سنة1977.

 

 والدها ووالدتها لبنانيين لكن ليها جذور مصرية فجدها الأكبر الشعراني نسبة " لباب الشعرية " سافر بيروت وتزوج لبنانية واستقر هناك. 

 

وحصلت على الجنسية المصرية سنة 2010 .

 

حكت الفنانة ميرنا وليد عن طفولتها والمواقف الصعبة اللي مرت بيها فعاشت حياة مؤلمة ومكانتش حاسة بالأمان ولا الدفء الأسري وخصوصًا بعد رحيل والدها وكان عندها وقتها 4 سنين.

 

قالت إن طفولتها إتدمرت بسبب الحروب الأهلية في لبنان، ومات والدها برصاصة عشوائية في القلب ، بعدها والدتها دخلتها مدرسة داخلية في رأس الجبل و مكانتش حاسة أبدًا بالسعادة بسبب الوحدة والروتين .

بعدها انتقلت من لبنان واستقرت في مصر من غير تخطيط وكان عندها 10 سنين فوالدتها كان عندها صديقة مقربة مصرية وقررت إنها تنزل القاهرة تزورها وأخدت ميرنا معاها ولما وصلت القاهرة حست بسعادة كبيرة وهى بتشوف التلاميذ مستنيين أتوبيس المدرسة وكانت بتراقب المشهد ده يومياً وطلبت من والدتها تدخل مدرسة في القاهرة فوافقت بعد لما تدخلت صديقتها واقنعتها.

 

دخلت عالم التمثيل من خلال فيلم بعنوان "رجل في فخ النساء من بطولة بوسي و فاوق الفيشاوي سنة 1987 لكن بدايتها الحقيقية لما إترشحت أثناء دراستها في الصف الأول الثانوي وشاركت في فيلم "الراعي والنساء" سنة 1991، وكانت بتلعب دور بنت سعاد حسني اللي وقعت في حب أحمد زكي وقالها بعد الفيلم إنها هتكون نجمة كبيرة لما تكبر.

 

أما حياتها الخاصة إتقدم ليها صديقها الطيار وائل الدجوي ولما فكرت في الموضوع لقت إن حلمها إنها تكون أم وتبني بيت فوافقت وأنجبت منه بنتين وهما" مايا ومريم ".

 

وقالت كمان إنها عانت من غيرته عليها في الخطوبة وأول الزواج وبعد كده هدى شوية واقتنع إنه متزوج من فنانة .

 

وصرحت إنها مش هتشجع بناتها للإنضمام للفن، ولكن ده مش معناه إنها هتقف عقبة في طريقهم لو حبوا يدخلوا الفن ،وهتقف معاهم أيًا كانت إختياراتهم.

 

وعن سر إبتعادها عن الساحة الفنية قالت ميرنا إنها بتتعامل مع مهنتها بمنطق الهواية بعيد عن إنه أكل عيش يعني لازم تقتنع بالنص المعروض عليها الأول ومش بتعرف تقدم أي عمل فني لمجرد إنها تكون موجودة وخلاص فالأهم بالنسبالها أنها تسيب بصمة، وكمان بترتب أولوياتها اللي أسرتها فيها بالمقام الأول، وهو المبدأ اللي ماشية عليه من بدايتها الفنية.

 

من أهم أعمالها التليفزيونية اللي شاركت فيها مسلسل" قيد عائلي ، خيوط الشمس ، علي مبارك ، قصة الأمس ،علي يا ويكا ، تعالى نحلم ببكره ، قاسم امين ".

 

ومن أعمالها السينمائية فيلم" اللحظات التي اختفت، لحظات حب ، اغتيال فاتن توفيق ، ديسكو ديسكو"

وشاركت في مسرحيات زي " روان والحرامية ، الفارس والعصابة".