من الصعب جدا عليا وصف لقب أو عدة ألقاب للفنان الراحل العظيم نور الشريف, وده لأن أعماله هي من تتحدث عنه وتوصفه أكتر بكتير من أي كلمات. فهو الحاج متولي وعبد الغفور البرعي والدالي، وهو برضو بطل لأشهر الأفلام السينمائية زي جري الوحوش والعار وغريب في بيتي  

.

نور الشريف أو محمد جابر محمد عبد الله زي ما سماه والده قبل ما يقوم نور الشريف بتغييره. 

إتولد في حي الخليفة بالقاهرة سنة 1946. 

 

إلتحق بكلية التجارة وشارك في فرقة التمثيل، وبدأ عشقه للفن من كل جوانبه وده الي خلاه يترك التجارة ويقرر الدراسة في المعهد العالي للفنون المسرحية. 

 

وكان للمعهد الفضل عليه في مشاركته في العمل بمسرحية "الشوارع الخلفية"، وبعدها إختار المخرج كمال عيد للمشاركة في مسرحية "روميو وجوليت" وبسببها تعرف على عادل أمام اللي عرفه على المخرج حسن إمام ليشارك معه في فيلم "قصر الشوق" وبعدها توالت أعماله السينمائية في عصر الستينات والسبعينات والثمانينات. 

 

وبدأ في الاتجاه إلى الدراما المصرية في عصر التسعينات وحقق فيها نجاحا كبيرا وترك بصمته في كل عمل يقدمه. 

 

وكانت أول مرة يشوف فيها بوسي في ماسبيرو لما كانت بتشارك هو وشقيقتها نورا في برامج الأطفال. 

وفي أواخر الستينات اتقابلوا مرة تانية بالصدفة في مسلسل القاهرة والناس وإتعرفوا على بعض وإشتعلت شرارة الحب بينهم بالرغم إن بوسي في الوقت ده كانت صغيرة وعمرها لا يتعدى 15 سنة. 

 

وإستمرت العلاقة دي بدون أي إرتباط رسمي لسنوات حتى قرر نور إنه يتقدم لخطبتها ولكن أهلها رفضوه بشدة وكان السبب في ده مهنة التمثيل والشائعات الي بتدور حواليها، وشائعات علاقات نور الشريف مع فتيات الليل.

 ده كمان غير انه كان ممثل مبتدئ ومحققش شهرة كبيرة تخلي أهلها يثقوا في مستقبل ابنتهم. 

بالفعل حاولوا يزوجوها لرجل ثري جدا بس هي رفضت وحاولت الإنتحار، فتراجعوا عن موقفهم ووافقوا على زواجها من نور الشريف. وبالفعل تمت الخطبة وإستمرت أشهر قليلة وبعدها أعلنوا الزواج رسميا سنة 1972. 

 

وصرحت بوسي إن نور الشريف من أفضل الرجال بعد الزواج، لأنه زوج متعاون ومحب وعطوف جدا على أسرته. 

بس هي كانت بتواجه أزمة كبيرة وهي عدم رؤيتها ليه فترة طويلة بسبب طبيعة شغله. 

 

أما عن حياتهم العملية، فنجح الثنائي نجاحا باهرا في السينما معا وأدوا أدوار مقدرش الجمهور لحد دلوقتي انه ينساها زي حبيبي دائما والعاشقان وانتهى بيهم الحال لتأسيس شركة انتاج بالشراكة بينهم. 

 

وبعد سنوات طويلة من الحب والنجاح، تفاجأ الوسط الفني بخبر إنفصال نور الشريف عن الفنانة بوسي بسبب الخلافات المستمرة بينهم.

 وفي الوقت دهحاول الأصدقاء المشتركين إرجاعهم لبعض ولكن كل محاولتهم فشلت.

 

ولم يعد هذا الزواج إلا بعد تسع سنوات من الطلاق بسبب مرض نور الشريف الي دفع بوسي للبقاء قريبة منه. 

وبعد أشهر قليلة جدا من رجوعهم توفى العظيم نور الشريف في أغسطس من سنة 2015.