واستمرت فترة زواجهم سنين كتير لكن في النهاية انفصلوا سنة 2006 ومفيش حد فيهم صرح عن السبب لكن نشرت الصحف إن سبب الإنفصال إن كان في علاقة جمعت بين الراحل نور الشريف والفنانة ساندي التونسية لكن محدش فيهم أكد ولا نفى الخبر ، لكن حب بوسي ونور أقوي من أي حاجه فرجعوا لبعض في فترة مرض نور الشريف وفي الآخر وانتهت بوفاته.

 وبعد وفاة الراحل نور الشريف إنتشرت شائعات عن زواج بوسي من الفنان فاروق الفيشاوي وإنهيار بنتها مي بسبب الخبر ده لكن كتبت بوسي على صفحتها الشخصية "زواجي من الزميل العزيز فاروق الفيشاوي إشاعة سخيفة من ناس مريضة ". 

وقالت بوسي إن أكتر حاجة فقدتها بعد رحيل نور الشريف وهى السند لإنه كان بالنسباله المرجعيه الصادقة في الحياة . 

 إسمها الحقيقي صافيناز مصطفى قدري . 

إتولدت في حي شبرا بالقاهرة يوم 26 نوفمبر 1953. إتخرجت من كلية التجارة سنة 1977 . 

وليها أُخت بتشتغل ممثلة وهى الفنانة المعتزلة نورا . 

بدأت التمثيل وكانت صغيرة جدًا في أول مشاركة ليها فيلم " هذا الرجُل أحبه " كان سنة 1962، وشاركت كمان في مسلسل جنة الأطفال وكان عندها وقتها 10 سنين . 

 بعدت فترة عن التمثيل بسبب إنشغالها بدراستها وكمان كانت ملامحها الرقيقة بتدي إنطباع إنها لسه طفلة وكانت وقتها إنتقلت من مرحلة الطفولة لمرحلة الشباب فقررت ترجع تاني للتمثيل بقوة وقدمت مجموعة أعمال منها " حبيبي دائمًا ، خالتي صفية والدير ، لعبة الإنتقام ، إعدام ميت ".